Araudia

ETXARRI ARANAZKO UDAL LIBURUTEGIAREN ARAUDIA

Xedea

Erabiltzaile guztiek Etxarri Aranazko Udal Liburutegiak eskaintzen dituen zerbitzuak aprobetxatzea eta gozatzea, eta jendearen eskura dauden materialak, ekipamenduak eta guneak behar bezala erabiltzea.

Materialak erabiltzea eta maileguz uztea

Liburutegiko materiala erabiltzeko eta maileguz uzteko, Nafarroako Liburutegien Sarearen arauak eta prozedurak bete beharko dira nahitaez.

1. Horretarako dagoen materiala erabiliko da liburutegian.

2. Xede horretarako dagoen materia soilik utziko da maileguz, eta 21 eguneko epean gehienez. Mailegua epe berberetan luzatzen ahalko da Internet bidez, telefonoz edo liburutegian bertan, erabiltzaile txartela erakutsiz. Erreserbatutako dokumentuen mailegua ezin izanen da luzatu. Erabiltzaileen betebeharrak.

3. Txartela aurkeztea.

4. Eskatutako materialak zaintzea eta ezarritako epean itzultzea.

5. Eskatutako materiala galdu edo apurtuz gero, eskatzaileak liburutegiko arduradunari esan eta beste bat ekarri beharko du.

Erabiltzaileen portaera

6. Portaerari dagokionez, erabiltzaileek ondoko baldintzak bete beharko dituzte:

• Isilik egotea
• Ez jatea, ez edatea.
• Ez erretzea.
• Sakelako telefonoak itzalita izatea.
• Liburutegiko arduraduna eta erabiltzaileak errespetatzea.
• Erabiltzaileendako guneak eta materiala behar bezala erabiltzea.
• Altzariak lekuz ez aldatzea (aulkiak, mahaiak...)
• Sei urtetik beherako haurrei heldu batek lagundu beharko die beti.

Haurtxokoa

7. Liburutegiaren arau orokorrak ez ezik, Haurtxokoaren erabiltzaileek ondoko arauak ere bete beharko dituzte:

• Liburutegiko haurtxokoa irakurtzeko eta margotzeko gunea da. Ez da haurtzaindegia, ez ludoteka, ez eta arratsaldea egonean emateko lekua ere. Debekatuta dago aulkiekin, liburuekin edo DVD diskoekin jolastea.
• Ezin da liburutegian sartu korrika, oihuka edo patinak jantzita.
• Barnean ezin da ez jan, ez edan.
• Sei urtetik beherako haurrei heldu batek lagundu beharko die beti.
• Liburutegiko materialak guztionak dira, eta zaindu behar dira guztion hobe beharrez. Guztion materialak ezin dira margotu, moztu, hautsi edo bota, eta hondatzen badira, haurren arduradunek materiala ekarri beharko dute.
• Liburutegiko gainerako erabiltzaileekiko begirunez, helduek haurrei lagunduko diete komunera joateko, ahalik eta isiltasun gehiena gordez betiere.

Arau-urratzeak eta zigorrak

8. Arauak urratzen badira, ondoko neurriak hartuko dira:

• Adingabeen arduradunak ahoz edo idatziz ohartaraztea.
• Liburutegira sartzeko eskubidea aldi baterako kentzea.
• Hondatutako edo hautsitako materiala ordaintzea.

Etxarri Aranazko Udalak jarriko ditu zigorrak, Liburutegiko Batzordeak egindako txostena aztertu ondoren.

9. Liburutegia behar bezala erabiltzea bertako arduradunaren eta Etxarri Aranazko Udalaren eginkizuna izanen da. Era berean, Etxarri Aranazko Udal Liburutegiko Batzordeak laguntzen ahalko die zeregin horretan.

10. Liburutegiko arduradunak gaitasuna izanen du erabiltzaileak ahoz ohartarazteko edo handik kanporatzeko, baldin eta ahozko ohartarazpenei kasurik egiten ez badiete, baztertu gabe araua urratu duenari geroago ezartzen ahal zaion zigorra.